Իբրև արծիվ սավառնում ես լեռ ու ժայռ,
Թնդացնում ես երկինք, գետինք տենչավառ,
Սուրբ անունդ պետք է հիշվի դարեդար.
Հսկա լերինք քեզ ապաստան, Անդրանի՛կ:
Թշնամիներ երբ լսեն քո անունը,
Օձերի պես պիտ սողան իրանց բույնը,
Երակներիդ ազնիվ քաջի արյունը
Չցամաքի մինչ հավիտյան, Անդրանի՛կ:
Հայոց կուսանք դափնյա պսակ թող հյուսեն,
Քնքույշ ձեռամբ քո ճակատը պսակեն,
Գոհարներով անվախ կուրծքդ զարդարեն,
Կեցցե՛ս հավետ դու անսասան, Անդրանի՜կ:
Հայաստանի սոխակները քեզ համար
Թող դայլայլեն գիշեր-ցերեկ անդադար
Անհաղթ մնաս դու քաջ, կռվի սիրահար,
Հայրենիքին տեր ու պաշտպան, Անդրանի՛կ:
1904
Գուսան Շերամ
Դու իմ մուսան ես,
Առանց քեզի
Երգել չեմ կարող.
Սրտիս տաւիղը,
Բացի քեզնից,
Էլ չունիմ լարող։
Սիրուն, սեւ աչերուդ,
Կարմիր վարդ այտերուդ,
Շանթ ունքերուդ, շուխ մազերուդ
Էլ ի՞նչ սուրմա է հարկաւոր
Էդ աննման փերուդ։
Ափսոս ջահել ես,
Նոր ես ծաղկել
Փնջիկ ես գարնան,
Քեզ ջան եմ տալիս՝
Չես հասկանում,
Անգութ հոգեհան։
Սիրուն, սեւ աչերուդ,
Կարմիր վարդ այտերուդ,
Շանթ ունքերուդ, շուխ մազերուդ
Էլ ի՞նչ սուրմա է հարկաւոր
Էդ աննման ‘երուդ։
♥ Գուսան Շերամ ♥
Գուսան Շերամի հրաշք ստեղծագործությունը Արաքսիա Գյույզադյանի կատարմամբ
